Monday, 19 June 2017

ചെരൻകോവ്  റേഡിയേഷൻ 


     ഒരു സുതാര്യമാധ്യമത്തിൽ പ്രകാശ വേഗതയെക്കാൾ  കൂടിയ വേഗതയോടെ സഞ്ചരിക്കുന്ന ഒരു ചാർജിത കണം ഉത്സർജിക്കുന്ന പ്രകാശം (വികിരണം) ആണ്‌ ചെരൻകോവ് റേഡിയേഷൻ .

     സമാനവേഗതയിൽ സഞ്ചരിക്കുന്ന ഒരു ചാർജിത കണം വൈദ്യുതകാന്തിക തരംഗങ്ങൾ ഉത്സർജിക്കുമെന്ന് ആദ്യമായി പ്രവചിച്ചത് 1904 -ൽ സോമർ ഫെൽഡ് ആയിരുന്നു .പ്രകാശ വേഗതയെക്കാൾ കൂടിയ വേഗതയിൽ ചാർജിത കണം സഞ്ചരിക്കുമ്പോളാണ് വികിരണ ഉത്സർജനം നടക്കുന്നത് .

     ആപേക്ഷിക സിദ്ധാന്തത്തിന്റെ വരവോടെ ഈ സങ്കല്പത്തിന് നിലനിൽപില്ലാതായി .ആപേക്ഷിക സിദ്ധാന്തമനുസരിച് ഒരു വസ്തുവിനും പ്രകാശ വേഗതയേക്കാൾ കൂടിയ വേഗതയിൽ സഞ്ചരിക്കാൻ കഴിയില്ല .എന്നാൽ 1934 -ൽ പി .എ .ചെരൻ കോവ് എന്ന റഷ്യൻ ശാസ്ത്രജ്ഞൻ പ്ലാസ്റ്റിക് ,ജലം ,ഗ്ലാസ് തുടങ്ങിയ സുതാര്യ മാധ്യമങ്ങളിലൂടെ സഞ്ചരിക്കുന്ന ചാർജിത കണങ്ങൾ നീലയോടടുത്ത പ്രകാശം പുറപ്പെടുവിക്കുന്നു എന്ന് കണ്ടെത്തുകയുണ്ടായി .തുടർന്ന് ഐ .എം ഫ്രാങ്ക് ,ഐ .ഇ .ടാം എന്നിവർ ഈ പ്രഭാവത്തിനു സൈദ്ധാന്തികമായ വിശദീകരണം നൽകി .പ്രകാശത്തിനു പരമാവധി വേഗത കൈവരിക്കാൻ കഴിയുന്നത് ശൂന്യതയിലാണ് .എന്നാൽ ഗ്ലാസ് ,ജലം തുടങ്ങിയ സുതാര്യ മാധ്യമങ്ങളിൽ പ്രകാശ പ്രവേഗം കുറയുന്നുണ്ട് .ജലത്തിൽ ഈ വേഗത ഏകദേശം 2 .25 x 10 ^ 8 മീറ്റർ / സെക്കണ്ടും  ഗ്ലാസിൽ 2 x 10^ 8 മീറ്റർ / സെക്കണ്ടും ആണ് .ഇത്തരം മാധ്യമങ്ങളിൽ കൂടി ഇതിലും വേഗതയിൽ ചാർജിത കണങ്ങൾക് സഞ്ചരിക്കാൻ കഴിയും .അതിവേഗത്തിൽ സഞ്ചരിക്കുന്ന ചാർജിത കണങ്ങളുടെ വൈദ്യുതക്ഷേത്രം അവയുടെ പാതയിലുള്ള മാധ്യമ  ആറ്റങ്ങളെ  ഉത്തേജിപ്പിക്കുന്നതിന്റെ ഫലമായാണ് പ്രകാശ ഉത്സർജനം സംഭവിക്കുന്നത് .ചെരൻ കോവ്‌ നടത്തിയ പരീക്ഷണങ്ങളിൽ ഉപയോഗിച്ചിരുന്ന റേഡിയോ ആക്റ്റീവ് പദാർത്ഥങ്ങളിൽ നിന്നും ഉത്സർജിക്കപ്പെട്ട ഇലക്ട്രോണുകൾ പ്രകാശത്തിന്റെ വേഗതയേക്കാൾ വേഗത്തിൽ സഞ്ചരിച്ചതാണ് വികിരണം ഉത്സർജിക്കാനുള്ള കാരണം എന്ന് വിശദീകരിക്കപ്പെട്ടു .പ്രകാശത്തിന്റെ വേഗതയോടെ മാത്രമേ വൈദ്യുത കാന്തിക വികിരണത്തിനു സഞ്ചരിക്കാൻ കഴിയു എന്നതിനാൽ ഈ വികിരണങ്ങൾക്കു ചാർജിതകണത്തിനെ ഒരിക്കലും മറികടക്കാൻ കഴിയില്ല .വികിരണങ്ങൾ ഒരു സ്‌തൂപ (cone )രൂപത്തിലായിരിക്കും പ്രസരിക്കുക .ഇതിന്റെ ശീർഷത്തിലായിരിക്കും ചാർജിന്റെ സ്ഥാനം .സൂപ്പർ സോണിക് വേഗതയിൽ സഞ്ചരിക്കുന്ന ഒരു വസ്തുവിൽ നിന്ന് പ്രസരിക്കുന്ന ശബ്ദ തരംഗങ്ങൾക്കു സമാനമാണിത് .ഈ കണ്ടുപിടുത്തതിന്റെ പേരിൽ ചെരൻ കോവ് ,ടാം ,ഫ്രാങ്ക് എന്നിവർക്ക് 1958 -ലെ ഭൗതികത്തിനുള്ള നോബൽ സമ്മാനം നൽകപ്പെട്ടു .

     ചെരൻ കോവ്‌ റേഡിയേഷന് കനഭൗതിക രംഗത്ത് ഏറെ പ്രാധാന്യമുണ്ട് .വികിരണം ഉത്സർജ്ജിക്കുന്ന സ്‌തൂപത്തിന്റെ അർദ്ധകോൺ കണങ്ങളുടെ വേഗതയെ ആശ്രയിച്ചിരിക്കുന്നു .അതിനാൽ കോൺ അറിയാമെങ്കിൽ വേഗത കണ്ടുപിടിക്കാം .ചെരൻ കോവ് ഡിറ്റക്ടറും അതോടൊപ്പം മറ്റു പലതരത്തിലുമുള്ള ഡിറ്റക്ടറുകളും ഉപയോഗിച്ച കണങ്ങളെ തിരിച്ചറിയാനും അവക്കുണ്ടാകുന്ന മാറ്റങ്ങൾ കണ്ടുപിടിക്കാനും കഴിയും .ന്യൂട്രിനോകളെ കുറിച്ചുള്ള പരീക്ഷണങ്ങളിൽ ഇത്തരം സജ്ജീകരണങ്ങൾ ഏറെ സഹായിക്കുന്നു .ജലത്തിൽ സ്ഥാപിച്ചിട്ടുള്ള റിയാക്ടറുകളിൽ നീല ദീപ്തിയായി ചെരൻ കോവ്  റേഡിയേഷൻ വ്യക്തമായി കാണാം . 

No comments:

Post a Comment

Blogger Random – Recent – Specific Label Posts Widget – All in One Post Feed Widget